دەستپێک / بابەت / جووته‌ سێوی بابی

جووته‌ سێوی بابی

Apple

زۆر له‌ مێژ بوو به‌ ئاواتی رۆژێکی ئه‌وتۆوه‌ ده‌ژیا . ده‌نگی ورینگه‌ی دڵی له‌ قه‌فه‌سی سینگیدا به‌ڵگه‌یه‌کی شایانی باس بوو . شنه‌ی دڵ بلاوێن توێڵاخی ته‌می خه‌می دڵی راماڵیبوو . گۆوه‌ند و دیلانی له‌یلان که‌ف و کوڵی سه‌رده‌می تووشی ، هه‌وێن ئاسا ده‌مه‌یاند . بیره‌وه‌ریه‌ کۆنه‌کان چزوویان به‌ شلکه‌ی ماسوولکه‌کانی دادێنا و گرمووژنه‌ی شادی له‌ سه‌رتاپای جه‌سته‌یدا سه‌ریان ده‌رهێنابوو . مووه‌کانی ته‌واوی قالبه‌ندی کرژ هه‌ڵاتبوون و به‌ وێنه‌ی سیخی سیخوڕ له‌ په‌یکه‌ری تووشیه‌کانی سه‌ر رێگای ژیانی ر‌ۆ ده‌چوون . ناخی پڕ له‌ داخی له‌ کوڵ و کۆ که‌وتبوو و کۆنه‌ هه‌واری شادی نوێ ببۆوه‌ . فیکه‌ی لاوان ، بزه‌ی کیژان و گه‌مه‌ی کۆرپه‌ڵان به‌ره‌و نشێوێکی پڕله‌یادگاریان جاڵه‌ کردبۆوه‌ که‌ له‌ داخ و ژانه‌کانی ژیانی ئاسه‌وارێک به‌دی نه‌ده‌کرا . وێڕای دڵی پڕ له‌ شادی له‌ ترۆپکی ئاوات و ئاره‌زوودا له‌ سه‌رچۆپی دابوو و چاوی له‌ فرشته‌ی هیوای ده‌گێڕا ، که‌چی بۆ نه‌گبه‌تی دوو کۆرپه‌ی ساوای بێ نه‌وا سه‌رنجیان راکێشا و هه‌ودای خه‌یاڵیان پساند که‌ له‌ گه‌رمه‌ی گه‌مه‌ی زار و زیچاندا له‌ گوێ سوانه‌ی کۆنه‌ کاولێک دووره‌په‌رێز وێستابوون و مات و مه‌لوول سه‌یری کۆڕی هه‌ڵپه‌ڕکێیان ده‌کرد .

ئه‌و جووته‌ کۆرپه‌ بێ نازه‌ له‌ به‌ر به‌ نازیان وه‌ها هه‌ڵکه‌وتبوون که‌ نه‌ ته‌نیا له‌ مێهر و وه‌فا تۆرابوون به‌ڵکوو له‌ خۆشیه‌کانی ژیانیش نامۆ بوون ، چونکوو په‌وه‌رده‌ی ده‌ستی دڵسۆزێک بوون که‌ به‌ هه‌ستی وه‌فاداری خۆی پێی ده‌گه‌یاندن و به‌ هیچ جۆرێک نه‌یداڕه‌نجاندن . ئه‌و جووته‌ خه‌ڵفه‌ شلک و ناسکه‌ له‌ ئامێزی باوکێکی هێند به‌ ئه‌مه‌گدا گوورابوون که‌ هه‌رگیز دڵی نه‌ده‌هات ناوی یه‌کیان به‌ ته‌نیا بێنێت و ته‌نانه‌ت ناوه‌که‌یانی له‌ دڵدا سڕیبوونه‌وه‌ و ته‌نیا بانگی ده‌کردن ((جووته‌ سێوی بابی!!))

جووته‌ سێوێک که‌ به‌ ساوایی که‌وتنه‌ به‌ر شه‌پۆلی به‌ ته‌وژمی رق و قینی گه‌ردوون و به‌ نه‌گه‌یوی به‌ری داری هیوایان وه‌ری . لک و پۆپی باغی ئاواتیان بوونه‌ ئاوردووی گڕه‌پێچه‌کانی کوانووی ژیان و باوکی ناکامیان به‌ ناچاری هه‌مبه‌ر به‌ باری گرانی نه‌داری چۆکی دادا . هه‌ل و مه‌رجی ناله‌باری ژیان تووشی ئه‌و تووشیه‌ی کرد که‌ به‌ مه‌به‌ستی به‌ربه‌ستی که‌موکورتی و پێداویسته‌کانی گوزه‌ران له‌ رێچکه‌ی ژیان به‌رڕێ بێت و له‌ تاریکه‌شه‌وێکی ئه‌نگوست له‌ چاودا بکه‌وێته‌ به‌ر لاتاوێکی لابه‌لا و دوور له‌ چاوی جووته‌ سێوه‌که‌ی چاوه‌ گه‌شه‌ ره‌شه‌کانی له‌ سه‌ر یه‌ک بنێت و به‌ دڵێکی پڕ له‌ ئاخ و ئۆفه‌وه‌ ماڵاوایی له‌ کوێره‌وه‌ریه‌کانی ژیان بکات .

هه‌ر چه‌ند که‌ ده‌ستی له‌ ئێخه‌ و به‌رۆکی چه‌رمه‌سه‌ریه‌کانی رۆژگار داڕنا و به‌ رواڵه‌ت له‌ کۆڵ کۆڵکێشی بۆوه‌ ، به‌ڵام دیسانیش هه‌ر به‌ بێ مرادی که‌وته‌ به‌ر ددانه‌ی جه‌نجه‌ڕی گه‌ردوون و باغێکی هێند ساوای به‌ جێ هێشت هه‌ر مه‌پرسه‌ . ئه‌و باغه‌ی به‌ ئاوی کانیاوی دڵی پاراو کردبوو، به‌ مه‌قه‌ستی هه‌ستی ناسکی هه‌ڵیپه‌رداوتبوو .

رۆژ نه‌بوو که‌ ده‌یان و بگره‌ سه‌دان جار له‌ ئامێزی پڕ له‌ سۆزی خۆیان نه‌گرێت و ئه‌سرینی شادیان به‌ سه‌ردا نه‌وه‌رێنێت و له‌ به‌ژن و باڵایان رانه‌مێنێت . زۆر جار پاپۆڕی خه‌یاڵی له‌ گۆلی گه‌ردووندا بناو ده‌بوو و به‌ ده‌م داڵغه‌وه‌ ده‌یگوت : ((تۆ بڵێی رۆژێک له‌ رۆژان ئه‌ستێره‌ گه‌شه‌ی خولی ژیانم له‌ بوولێڵه‌ی ته‌مه‌نمدا بدره‌وشێته‌وه‌ و له‌ رووناکایی بحه‌سێمه‌وه‌ ؟ تۆ بڵێی داری هیوام بێته‌ به‌ر و جووته‌ نه‌مامه‌ سێوی باغچه‌ی ژیانم ره‌گ و ریشه‌ داکوتن و به‌ شێوه‌یه‌کی ئاسایی خۆ داڕێژن ؟ تۆ بڵێی به‌ر له‌وه‌ی بارگه‌وبنه به‌ره‌ومه‌ڵبه‌ندی خامۆشان تێکه‌وه‌ پێچم و خاک و خۆڵی فه‌رامۆشی چاوم پڕ بکه‌نه‌وه‌ ، چاوم به‌ به‌روبوومی په‌رێزم رووناک ببێته‌وه‌ و …))

گه‌لێک خۆزگه‌ی ئه‌وتۆی بوونه‌ توێشووی ئاخرین کۆچ . بوونه‌ بارگه‌یه‌ک که‌ له‌ سه‌ره‌مه‌رگیشدا له‌ کۆڵی نه‌ده‌بوونه‌وه‌ و له‌ توربێنی هیواکانیدا سه‌رباری سه‌فه‌ری بوون . هه‌ر بۆیه‌ له‌ ئاویلکه‌شدا زایه‌ڵه‌ی ده‌نگی، دڵی به‌ردئاسای ده‌کرده‌ ئاو که‌ به‌ ده‌م غاڵه‌غاڵه‌وه‌ ده‌یگوت:

ئاخ جووته‌ سێوی بابی !!! خۆزگه‌ هه‌تا دڵه‌ بچکۆله‌که‌م له‌ کار نه‌که‌وتووه‌ ، خۆزگه‌ هه‌تا بێ ناز و بێ ئاو ، دوور له‌ نوێن و بان ، له‌ چۆلگه‌ و لێڕه‌واره‌کاندا چاوم له‌ سه‌ر یه‌ک نه‌ناوه‌ ئه‌وجاریش ئێوه‌م له‌ ئامێزی خۆم گرتبایه‌ و سه‌رگۆنام رامووسیبان .

به‌ڵام هه‌زار داخ و مخابن ، ته‌مه‌ن بێ وه‌فایی له‌ گه‌ڵ کرد و به‌ هیچ کام له‌ خۆزگه‌کانی نه‌گه‌یشت و به‌ جوانه‌مه‌رگی سه‌ری نایه‌وه‌ .

هێرش بێتووشی

……………………………………………………………………………………………………………………….

‌ ئه‌م به‌رهه‌مه‌ به‌ ناسناوی(دڵشاد) که‌ ناوی برای بچووکمه‌ له‌ دوو لاپه‌ڕه‌ی 34 و 35 ی گۆڤاری ژماره‌ 45 ی سروه‌-‌‌ ‌خاکه‌لێوه‌ی ساڵی 1369 ی هه‌تاو-‌ ناوه‌ندی بڵاوکردنه‌وه‌ی سه‌لاحه‌ددینی ئه‌یووبی له‌ ورمێ  ، چاپ و بڵاو کراوه‌ته‌وه‌.

لەبارەی هێرش بێتووشی

ناوی ته‌واوم (ساڵح ساڵح زاده‌) ناسراو به‌ (هێرش بێتووشی) له‌دایکبووی رۆژی نۆهه‌می مانگی رێبه‌ندانی ساڵی هه‌زار و سێسه‌د و چلی هه‌تاویم. ناوی باوکم عه‌لی حه‌مه‌ساڵح له‌ به‌ره‌بابی ...

سەیری ئەمەش بکە

مێژوو چییه‌؟

مێژوو چییه‌؟ ئه‌وانه‌ی به‌ رابردووی خۆیاندا نه‌چنه‌وه‌ ده‌بێ دووپاتی بکه‌نه‌وه‌. ((جۆرج سانتایانا)) مێژوو چه‌مکێکی له‌ …

Leave a Reply

Your email address will not be published. Required fields are marked *