دەستپێک / بابەت / ئەدەب / سڵاو، یه‌كه‌م هه‌نگاوی‌ پێوه‌ندی‌

سڵاو، یه‌كه‌م هه‌نگاوی‌ پێوه‌ندی‌

Slaw (2)

 سڵاو كردن یه‌كێ له‌ داب و نه‌ریته‌ جوان و پڕ واتاكانی كۆمه‌ڵی مرۆڤایه‌تییه‌ كه‌ وه‌ك رۆچنه‌یه‌كی سه‌ره‌تایی بۆ پێوه‌ندی‌ گرتن و بناغه‌ تێهاویشتنی خۆشه‌ویستی به‌ رووی‌ یه‌كتریدا ده‌كرێته‌وه‌ . سڵاو سه‌ره‌تای‌ ده‌سپێشخه‌ریه‌كی ژیرانه‌یه‌ بۆ گرێبه‌ستی دۆستایه‌تی و پێكه‌وه‌ ژیانێكی پڕ له‌ خێر و خۆشی . سڵاو سه‌رچاوه‌یه‌كی هه‌ڵقوڵاو له‌ كانیاوی‌ دڵی مرۆڤه‌كانه‌وه‌یه‌ كه‌ تینوویه‌تی پێده‌شت و بێروونی هه‌ناو ده‌شكێنێت و ژیانێكی نوێ‌ به‌ به‌ر جه‌سته‌ی‌ ویشكارۆی‌ پێوه‌ندیه‌كاندا ده‌كاته‌وه‌ . سڵاو هێوریه‌كی بیر لاوێن و خه‌یاڵ راژێنه‌ كه‌ هه‌ستی گڕگرتووی‌ هێشاو و به‌ ژان داده‌مركێنێته‌وه‌ و بگره‌ وره‌ و وریایی تێده‌زێنێت و ده‌یگه‌شێنێته‌وه‌ . دوو كه‌سی تا بڵێی به‌ دوور له‌ هه‌ر وێكچوون و پێوه‌ندێه‌كی پێشتر، كاتێك كه‌ تووشی یه‌كتری ده‌بن به‌ سڵاو له‌ یه‌كتر ده‌رگای‌ هه‌موو هه‌ست و ویستێك به‌ رووی‌ یه‌كدا ده‌كه‌نه‌وه‌ . هه‌ر له‌ رێگای‌ ئه‌و سڵاوه‌شه‌وه‌ بنچینه‌ی‌ هه‌موو پێوه‌ندیه‌كی ده‌روونی ، ئه‌وینداری‌ ، رامیاری‌ ، كۆمه‌ڵایه‌تی و … تێده‌هاوێژرێت . وێڕای‌ ئه‌وه‌ش سڵاو مه‌رهه‌مێكی ساڕێژكه‌ره‌وه‌ی‌ تێكڕای‌ هه‌سته‌ رووشاوه‌كانی سه‌ر دڵ و ده‌روونی دژ و نه‌یاران هه‌مبه‌ر به‌ یه‌كتره‌ . له‌ رێگای‌ سڵاوه‌وه‌ سۆزی‌ له‌ ده‌س چوو وه‌ده‌ست دێته‌وه‌ ، دێبه‌ری‌ ره‌قه‌ن و ویشكارۆی‌ رق و تووڕه‌ییه‌كان خووس دێنێته‌وه‌ و بگره‌ پاراوتریش له‌ رابردووی‌ به‌روبووی‌ سۆزداری‌ ده‌دات .

        سڵاو كردن له‌ هه‌ر كه‌سێك به‌ واتای‌ په‌یام و پێڕاگه‌یاندنێكی گرنگه‌ له‌ راستای‌ پاش گوێدانی كێشه‌ و ناڕه‌واییه‌كانی نێوانیاندا . له‌ راستای‌ نه‌مانی ناكۆكی و ته‌شه‌نه‌ كردنه‌كانی نائاساییدا . له‌ راستای‌ نه‌چوونه‌وه‌ ژێر باره‌كانی ناهه‌مواری‌ كێ به‌ركێیه‌تی و ململانه‌ نه‌خوازراوه‌كانی سه‌ر سه‌كۆی‌ ژیاندا . له‌ راستای‌ نه‌هێشتنی هه‌موو هه‌ڵڵا و بگره‌ و به‌رده‌یه‌كدا كه‌ وه‌كوو ده‌سپێكێك له‌ داهێنان و داڕشتنی گشت پیلانێكدا هه‌مبه‌ر به‌ یه‌كتر ده‌وری‌ سه‌ره‌كی ده‌بینێت و بگره‌ هه‌وێنی بوژاندنه‌وه‌یه‌كی نوێ‌ له‌ ژیانی مرۆڤه‌كان دایه‌ . ته‌نیا سڵاوه‌ مزگێنی ئارامگرتن و ئه‌مین بوونه‌وه‌ به‌ گشت كه‌سێكی به‌رامبه‌ر ده‌به‌خشێت و دڵنیای‌ ده‌كاته‌وه‌ كه‌ له‌ لایه‌ن منی به‌رامبه‌رته‌وه‌ هیچ وه‌زه‌نده‌یه‌كت پێ ناگات و له‌ بابه‌ت منه‌وه‌ له‌ سه‌ر و ژیان و ماڵی خۆت ئه‌مین و ئه‌مان به‌ . ئه‌وه‌ سڵاوه‌ ده‌روازه‌ی‌ رق و كینه‌ و دووبه‌ره‌كایه‌تی به‌ رووی‌ یه‌كتر دا داده‌خات و وه‌ك راگرێكی تا بڵێی پته‌و و قایم یه‌كیه‌تی نێوان مرۆڤه‌كان ده‌پارێزێ . له‌ هه‌مبه‌ریشدا ده‌روازه‌ی‌ بزه‌ و به‌ پیریه‌كتره‌وه‌ چوون به‌ رووی‌ كه‌سه‌كاندا ده‌كاته‌وه‌ . ته‌نیا سڵاوه‌ چه‌كه‌ره‌ی‌ هیوا به‌ ژیانێكی به‌ختیار له‌ په‌نای‌ یه‌ك و له‌ سێبه‌ری‌ یه‌كتردا له‌ دڵ و هه‌ناوی‌ مرۆڤه‌كاندا ده‌نێژێ و وه‌كوو ئاوێكی ئاگر دامركێن هێوری‌ و هێمنایه‌تی به‌ لانكۆڵه‌ی‌ دڵه‌كان ده‌به‌خشێته‌وه‌ .

        وشه‌ی‌ سڵاو له‌ فه‌رهه‌نگی دێرینی نه‌ته‌وه‌یی و ئایینی پیرۆز و بێ گه‌ردی‌ ئێمه‌ دا به‌ وردبینیه‌كی ژیرانه‌ی‌ شایانی رێز و هه‌ڵسه‌نگاندنه‌وه‌ داهێنراوه‌ و به‌ شێوازێكی گرنگی ده‌روونناسیانه‌ خراوه‌ته‌ بواری‌ نرخاندن و گه‌شه‌ پێدانه‌وه‌ . ناوی‌ دینی ئێمه‌ ئیسلامه‌ كه‌ له‌ ریشه‌ی‌ سه‌لام و ئاشتیخوازی‌ و ئاشتیپاریزیه‌وه‌ سه‌رچاوه‌ی‌ گرتووه‌ ، هه‌ر بۆیه‌ كه‌ چاومان به‌ یه‌كتر ده‌كه‌وێ له‌ سه‌رچاوه‌ی‌ دڵمانه‌وه‌ جۆگه‌یه‌كی خۆشه‌ویستی به‌ ده‌رماڵی دڵی یه‌كتردا به‌ جۆماڵی ده‌به‌ینه‌وه‌ و له‌ بناوانی هه‌ستی یه‌كترویستیدا په‌نداوی‌ پێده‌ده‌ینه‌وه‌ .

        به‌ راستی فه‌رهه‌نگ و رێبازی‌ راسته‌قینه‌ی‌ دینیمان له‌ چاو ئه‌م و ئه‌و له‌ راده‌یه‌كی هێند به‌رچاو دا له‌ لووتكه‌ دایه‌ و هێند داب و نه‌ریتی جوان و پێشكه‌وتوانه‌ی‌ تێدا به‌دی‌ ده‌كرێ كه‌ شایانی خۆ پێوه‌ ڕانانه‌ و له‌و راستایه‌شدا ، پێویسته‌ وه‌ك داهات و بوونیه‌تێكی سه‌رفرازانه‌ی‌ نه‌ته‌وه‌یی بۆ گه‌له‌كه‌مان ، سۆما ئاسا بیانپارێزین و به‌وپه‌ڕی‌ رێزه‌وه‌ بره‌ویان پێ بده‌ین . به‌ تایبه‌ت له‌و روانگه‌وه‌ كه‌ پێغه‌مبه‌ری‌ خۆشه‌ویست و ئیمامه‌ رێزداره‌كانمان وه‌ك پێشه‌نگ و پێشه‌وا ته‌نیا له‌ قسه‌ و پڕۆسه‌ دارشتندا نه‌ماونه‌ته‌وه‌ و به‌ كرده‌وه‌ ئه‌و داب و نه‌ریته‌ پاراو و پوختانه‌یان پاراستوون و راسته‌وخۆ له‌ ژیانی رۆژانه‌یاندا ده‌كاریان هێناون . وێڕای‌ ئه‌وه‌ش ره‌وشت و رێكاری‌ ژیان و بوونیان هه‌مووی‌ ئه‌و داب و نه‌ریته‌ دینی و كۆمه‌ڵایه‌تیانه‌ بوون كه‌ هۆزانانی بیانی زیره‌كانه‌ له‌ ژێر ناوی‌ واتاكانی ره‌وانناسیدا ناساندوویانن و ده‌كاریان كردوون و  بێ پسانه‌وه‌ش له‌ به‌رژه‌وه‌ندی‌ فه‌رهه‌نگ و كولتووری‌ نه‌ته‌وه‌ییاندا له‌ هه‌وڵی گه‌شه‌ پێدانیان دان .

سڵاو له‌ روانگه‌ی‌ قورئانه‌وه‌

        سڵاوی‌ سه‌رچاوه‌گرتوو له‌ كانیاو و چاوگی بڕوادارییه‌وه‌ په‌یامێكی مه‌زن و هێژایه‌ و قوڕئانی پیرۆز گرنگێكی تایبه‌تی پێداوه‌ ، كه‌ واته‌ پێویسته‌ ئێمه‌ی‌ ئیمانداریش وه‌كوو سه‌رچاوه‌یه‌كی بڕواداریمان و تاقه‌ یاسای‌ ژیانمان له‌ هه‌واری‌ بوونماندا ئاماژه‌ به‌ هه‌ندێك له‌و فه‌رمووده‌ هێژایانه‌ی‌ یه‌زدان له‌ مه‌ڕ سڵاوه‌وه‌ بكه‌ین و به‌ رێزه‌وه‌ بیاننرخێنین :

       ((هه‌ر كه‌سێكی چاك و خۆشیتان لێ ده‌كات ، ئێوه‌ چاكتر چاك و خۆشی ده‌گه‌ڵ بكه‌ن ، یان وه‌كوو ئه‌و وڵامه‌كه‌ی‌ بده‌نه‌وه‌ ،  خوا به‌ هه‌موو شت راده‌گا . سووڕه‌ی‌ ( نیسا ) ئایه‌ی‌ 86((

))         ئه‌ی‌ گه‌لی خاوه‌ن باوه‌ڕان ! جیا له‌وه‌ ماڵی خۆتان بێ ، سه‌ر به‌ هیچ ماڵاندا مه‌كه‌ن هه‌تا ئیزنێ نه‌خوازن و سڵاو له‌ خه‌ڵكه‌كه‌ی‌ نه‌كه‌ن . ئه‌مه‌ بۆ ئێوه‌ باشتره‌ و شایه‌ت په‌ندی‌ لێ وه‌ربگرن .  سووڕه‌ی‌ ( نوور ) ئایه‌ی‌ 27 ((

))        پیاوانێك هه‌ن له‌ سه‌ر ئه‌عراف راوه‌ستاون ، هه‌موو كه‌سێ به‌ ته‌رح و بیچم ده‌ناسن ، ده‌نگ له‌و به‌هه‌شتیانه‌ ده‌كه‌ن – كه‌ هێشتا نه‌چوونه‌ته‌ نێو به‌هه‌شته‌وه‌ ، به‌ڵام به‌ ته‌مان بیچنێ – سڵاوتان لێ بێ . سووره‌ی‌ (ئه‌عڕاف) ئایه‌ی‌ 46 ))

))         ئه‌و كه‌سانه‌ی‌ فرشته‌ گیانیان ده‌كێشێ و چاك و پاك له‌ دنیا ده‌ڕۆن ، ئێژن : سڵاوی‌ خواو لێ بێ و له‌ باتی كرده‌وه‌كانتان ده‌بچنه‌ ناو به‌هه‌شته‌وه‌ . سووڕه‌ی‌ ( نه‌حل ) ئایه‌ی‌ 32 ((

         ((ئه‌و كه‌سانه‌ش كه‌ هه‌ر له‌ په‌روه‌ره‌نده‌یان ترسیان بووه‌ ، ده‌سته‌ ده‌سته‌ به‌ره‌و به‌هه‌شت به‌ ڕێ‌ ده‌كرێن و ده‌رگایان بۆ ده‌كرێنه‌وه‌ و كاربه‌ده‌ستانی به‌هه‌شتی پێیان ئێژن : سڵاو له‌نگۆ ، به‌خێرهاتن ، بچنه‌ ژووره‌وه‌ و هه‌ر و هه‌ر ، هه‌ر له‌ وێ‌ دابن . سووڕه‌ی‌ ( زومه‌ر ) ئایه‌ی‌ 73 ))

))         راسپارده‌كانی ئێمه‌ش مژده‌یان دا به‌ ئیبڕاهیم . گوتیان : سڵاو . وتی : سڵاو . سووڕه‌ی‌ ( هود ) ئایه‌ی‌ 69 ))

       ((ئه‌وێ‌ رۆژێ‌ كه‌ دێنه‌ به‌ر باره‌گای‌ ئه‌و ، به‌ سڵاو به‌ خێریان دێنێ و پاداشێكی پڕ بایه‌خی بۆ داناون . سووڕه‌ی‌ ( ئه‌حزاب ) ئایه‌ی‌ 44 ))

))         سڵاوتان لێ بێت ، چونكوو ئێوه‌ خۆڕاگر بوون ، پیرۆزتان بێ دوارۆژی‌ روون . سووڕه‌ی‌ ( ره‌عد ) ئایه‌ی‌ 24 ((

         ((جا ئه‌وانه‌ له‌ پاداشی خۆڕاگرتنیان ئۆده‌{كانی به‌هه‌شت} یان پێ ده‌درێت و له‌ وێدا هه‌ر به‌ دروود و سه‌لامه‌وه‌ ته‌كیانا روو به‌ روو ده‌بن . سووڕه‌ی‌ ( فورقان ) ئایه‌ی‌ 75))

))       عه‌بده‌ راسته‌كانی ره‌حمان ئه‌و كه‌سانه‌ن كه‌ بێ ده‌عیه‌ ده‌چنه‌ رێوه‌ و هه‌ر كاتێكیش نه‌زانه‌كان بیاندوێنن ، ( به‌ سڵاو) وڵامی نه‌رم و نیانیان ده‌ده‌نه‌وه‌ . سووڕه‌ی‌ (فورقان) ئایه‌ی‌ 63  ))

         ((هه‌ر كه‌ وتاری‌ هه‌رزه‌شیان به‌ گوێ‌ ده‌گا ، له‌ گوێی خۆیانی ده‌رداوێن و ئێژن كه‌ : ئێمه‌ كاری‌ خۆ ده‌كه‌ین و ئێوه‌ش ئاكاری‌ خۆو هه‌یه‌ ، (سڵاوتان لێ بێت ) له‌ ئێمه‌وه‌ بێ وه‌زه‌نن ، كه‌یفن به‌ نه‌زانان نایه‌ . سووڕه‌ی‌ (قه‌سه‌س) ئایه‌ی‌ 55 ))

سڵاو له‌ روانگه‌ی‌ پێغه‌مبه‌ری‌ رێزداره‌وه‌ (د.خ)

        هه‌ڵسوكه‌وت و ره‌وشته‌ به‌رزه‌كانی ئه‌و خۆشه‌ویسته‌ بێ بژار و لێك هه‌ڵواردن له‌ راده‌یه‌كدا شوێندانه‌ریان له‌ سه‌ر كۆمه‌ڵی مرۆڤایه‌تی بووه‌ و هه‌یه‌ كه‌ هیچ نكولیه‌كی لێ ناكرێ . به‌ تایبه‌ت له‌ مه‌ڕ بابه‌تی به‌رباسدا به‌ راده‌یه‌ك گرنگی پێداوه‌ كه‌ ، له‌ گوێره‌ی‌ بۆ لواندا قه‌ت مه‌ودای‌ نه‌داوه‌ ، كه‌س ده‌سپێشخه‌ری‌ سڵاو لێكردنی لێ بكات و هه‌میشه‌ ئه‌و شانازیه‌ی‌ بۆ خۆی‌ پارستووه‌ ، كه‌ ئه‌وه‌ش هه‌ر نیشانه‌ی‌ گه‌وره‌یی ئه‌و گه‌وره‌یه‌ .

        هه‌روه‌ها فه‌رموویه‌تی: (( له‌ به‌هه‌شتی به‌ریندا هه‌ندێ‌ كۆشك و قه‌سری‌ هه‌تا بڵێی به‌رچاو و به‌ دیمه‌ن رازاونه‌ته‌وه‌ كه‌ ، هه‌ر له‌ رووكاری‌ رواڵه‌تیانه‌وه‌ هه‌ست به‌ خۆشی و رێكی ناوه‌وه‌یان ده‌كرێت و له‌ ژووری‌ كۆشكه‌كانیشه‌وه‌ هه‌ست به‌ رێكی و جوانی ده‌ره‌وه‌یان ده‌كرێت و له‌ بیناكاریشدا تاكن ، ئه‌و قه‌سرانه‌ش تایبه‌ت به‌ كه‌سانێكن كه‌ له‌ سڵاو و چاك و چۆنی كردن له‌ گه‌ڵ خه‌ڵكیدا هه‌میشه‌ ده‌سپێشخه‌ر و ده‌م و راوێژ خۆش و ره‌زا شیرین و به‌ گفت و دوێ‌ بوون و خۆیان نه‌بواردووه‌ . (( بحارالانوار /76/2 (( .

         ((كاتێك كه‌ خوای‌ گه‌وره‌ ئاده‌می دروست كرد پێی فه‌رموو : بڕۆ سڵاو له‌و كۆمه‌ڵه‌ مه‌لائیكه‌ بكه‌ كه‌ دانیشتوون و گوێ‌ بده‌یه‌ چۆن وڵامی سڵاوه‌كه‌ت ده‌ده‌نه‌وه‌ . چونكوو ئه‌وه‌ سڵاوی‌ ئێوه‌ و وڵامی سڵاوی‌ ئێوه‌ و پاشماوه‌كانته‌ . ئاده‌م فه‌رمووی‌ : سڵاوتان لێ بێت . ئه‌وانیش وڵامیان دایه‌وه‌ : سڵاو له‌ ئێوه‌ و ره‌حمه‌تی خوای‌ گه‌وره‌شتان لێ بێت .                 (ریازوسالحین) لاپه‌ڕه‌ 315 ))

        له‌و فه‌رمووده‌یه‌شه‌وه‌ بۆمان ده‌ده‌كه‌وێ كه‌ رێبوار پێویسته‌ سڵاو كه‌ كه‌س یان كه‌سانی دانیشتوو بكات .

        ((چاكترین كه‌س له‌ ئێوه‌ به‌ لای‌ خوای‌ گه‌وره‌وه‌ ئه‌و كه‌سه‌یه‌ كه‌ زووتر سڵاو ده‌كات . (هه‌مان سه‌رچاوه‌) لاپه‌ڕه‌ 315 ))

))         ئیمام حوسێن ( ر ) فه‌رموویه‌تی : سڵاو حه‌فتا چاكه‌ی‌ هه‌یه‌ كه‌ شه‌ست و نۆ به‌شی ئه‌و چاكه‌یه‌ بۆ سڵاوكه‌ر و ته‌نیا به‌شێكی بۆ وڵامده‌ره‌وه‌یه‌ . ( تحف العقول ) لاپه‌ڕه‌ 177 ((

))         له‌ فه‌رمووده‌یه‌كی ئیمام سادقیشدا  ( ر )  هاتووه‌ : به‌ راستی به‌خیل ئه‌و كه‌سه‌یه‌ له‌ سڵاو كردندا به‌خیل بێت و  رژدی‌ و چرووكی ده‌كار بێنێ .  ئه‌و كه‌سانه‌ی‌ له‌ سڵاو كردندا پێشقه‌ده‌من و به‌ر له‌ كه‌سی به‌رامبه‌ریان سڵاو ده‌كه‌ن ، له‌ سێبه‌ری‌ ره‌حمه‌ت و خۆشه‌ویستی خودا ونێردراوی‌ به‌رێزی‌ ( د.خ )  خوا دان . ( المحجت البیزا ) /3/381 . ))

چۆن سڵاو بكه‌ین ؟

        به‌ گوێره‌ی‌ تاقیكاری‌ و ئه‌زموونه‌كانی رابردووان و ئه‌و كه‌سانه‌ی‌ له‌ بواری‌ رێزداریدا له‌ كڵی جه‌ڕه‌باندن په‌ڕیونه‌ته‌وه‌ ، سڵاو كردن پێویسته‌ به‌ ده‌نگی به‌رز و رووی‌ كراوه‌ بكرێ . مرۆڤه‌كانی ده‌ورووبه‌رمان هه‌موویان له‌ ئاستێكی رێكی بینین و بیستن دانین و هه‌ر ئه‌و هۆكاره‌ش زۆر له‌ سڵاوه‌ سه‌ر لێویه‌كانی ئێمه‌ به‌ فیڕۆ ده‌دات و له‌و نێوه‌شدا تووشی دوو خه‌ساری‌ قه‌ره‌بوو نه‌بوو ده‌بین، یه‌كه‌میان كه‌ نه‌مانتوانیوه‌ هه‌ست و سۆزی‌ رێزداری‌ و خۆشه‌ویستی خۆمان ئاراسته‌ی‌ كه‌سی به‌رامبه‌رمان بكه‌ین و دووهه‌میشیان ده‌لاقه‌ی‌ نامۆیه‌تی و دڵ به‌ گه‌ردی‌ ئه‌و كه‌سه‌مان هه‌مبه‌ر به‌ خۆمان ئاواڵه‌ كردووه‌ . وێڕای‌ ئه‌وه‌ش هه‌ندێ‌ جار خۆمان تووشی دوو دڵی و گومان ده‌بین و به‌ هۆی‌ وڵام نه‌بیستنه‌وه‌ مه‌یله‌و تارمایی دڵ هێشیمان به‌ سه‌ر دادێ و وا ده‌نوێنین كه‌ گۆیا به‌ هێند نه‌گیراوین . كه‌چی له‌ راستیدا هه‌مووی‌ ئه‌وانه‌ ده‌گه‌ڕێنه‌وه‌ سه‌ر ئارام سڵاوكردنه‌كه‌ی‌ ئێمه‌  . چونكوو هیچ دوور نییه‌ لایه‌ن گوێی له‌ ده‌نگی ئێمه‌ نه‌بووبێت و ئێمه‌ به‌ خۆڕایی گله‌یی و گازنده‌ بكه‌ین و له‌ په‌ساری‌ تووڕه‌ییدا بۆسه‌ بگرین .

         هه‌روه‌ها له‌ وڵامدانه‌وه‌ به‌ سڵاویشدا هه‌ر ده‌بێ روو گه‌ش و ده‌نگ گه‌وره‌ و به‌ كه‌یف بین و به‌ وشه‌ و واتای‌ پاراو و ره‌وان و منه‌تبارانه‌ وڵام بده‌ینه‌وه‌ ، له‌ گه‌ڵ ئه‌وه‌شدا ده‌ستی رێزمان به‌ سینگمانه‌وه‌ بگرین و به‌ پێخۆشبوونه‌وه‌ سوپاسی لایه‌ن بكه‌ین . نه‌وه‌كوو سڵاوكه‌ر پێی وابێ گرنگێكی ئه‌وتۆمان به‌ سڵاوه‌كه‌ی‌ نه‌داوه‌ ، یان پاش گوێمان داوه‌ . كه‌ واته‌ مرۆڤی ئیماندار پێویسته‌ له‌ هه‌ر دوو به‌شی سڵاو كردن و وڵامدانه‌وه‌ به‌ سڵاودا له‌و په‌ڕی‌ لێبوردوویی دابێت و له‌وه‌ش گرنگتر هه‌ر دوو هه‌ڵوێسته‌كه‌ی‌ دڵخۆشكه‌ر و مزگێنیده‌ری‌ ژیانێكی به‌ ئاشتی و هێوری‌ و رێزداری‌ بێت .

سڵاو هێمای‌ خۆ به‌ كه‌مگری‌

        سڵاو كردن له‌ هه‌ر كه‌سێك نیشانه‌ی‌ ده‌ربڕینی هه‌ست و سۆزی‌ خۆ به‌ كه‌مگری‌ له‌ ئاستی ئه‌و كه‌سه‌ دایه‌ ، نیشانه‌ی‌ داهێنان و راهێنانی رووحی مه‌زنایه‌تی خۆت له‌ هه‌مبه‌ر كه‌سانی ده‌ورووبه‌ر دایه‌ ، نیشانه‌ی‌ داشكاندن له‌ هه‌وای‌ خۆ به‌ گه‌وره‌گری‌ و له‌ خۆ بایی بوونه‌ ، نیشانه‌ی‌ به‌ستی ته‌شه‌نه‌ی‌ بێزاری‌ ، نه‌هێشتنی ناڕێكی ، دامركاندنه‌وه‌ی‌ كوڵ و كۆی‌ تۆڵه‌ و به‌ بادانی هه‌وای‌ قه‌پۆز به‌رزییه‌ . پۆز و هه‌وای‌ خۆ به‌ گه‌وره‌بینی و له‌ خۆ باییه‌تی له‌ كۆمه‌ڵی مرۆڤایه‌تیدا به‌ هه‌ر هۆیه‌ك و له‌ هه‌ر بوارێكه‌وه‌ بێ نیشانه‌ی‌ دواكه‌وتوویی مرۆڤه‌ ، چونكوو هیچ پله‌ و پایه‌ و بوونیه‌ت و جوانیه‌ك ناتوانێ شان له‌ شانی پله‌ی‌ ئینسانیه‌ت بدات و هیچ گه‌نجینه‌یه‌كی سه‌ر ئه‌م گۆی‌ زه‌وییه‌ كه‌له‌به‌ری‌ خۆشه‌ویستی پڕ ناكاته‌وه‌ . هه‌ر دوو لایه‌نی ئینسانیه‌ت و سۆزداریش له‌ سه‌رچاوه‌ی‌ سڵاوه‌وه‌ دێن و له‌ پێده‌شتی هه‌راو و به‌رینی مرۆڤایه‌تیدا به‌ر ده‌گرن .  له‌ وته‌یه‌كدا سڵاو سڵامه‌تی دێنێ. سڵاو .

نووسینی : هێرش بێتووشی

سه‌رده‌شت  : 31/2/1386  ی‌ هه‌تاوی‌

لەبارەی هێرش بێتووشی

ناوی ته‌واوم (ساڵح ساڵح زاده‌) ناسراو به‌ (هێرش بێتووشی) له‌دایکبووی رۆژی نۆهه‌می مانگی رێبه‌ندانی ساڵی هه‌زار و سێسه‌د و چلی هه‌تاویم. ناوی باوکم عه‌لی حه‌مه‌ساڵح له‌ به‌ره‌بابی ...

سەیری ئەمەش بکە

مێژوو چییه‌؟

مێژوو چییه‌؟ ئه‌وانه‌ی به‌ رابردووی خۆیاندا نه‌چنه‌وه‌ ده‌بێ دووپاتی بکه‌نه‌وه‌. ((جۆرج سانتایانا)) مێژوو چه‌مکێکی له‌ …

Leave a Reply

Your email address will not be published. Required fields are marked *